ŽEREN I LOČEN Pedoče na buzaru

Kad su još Mleci po svojim galijama parićavali morsku spizu u bronzinu oli kotlu (busara, buzzara), siguro nisu pensali da će se vikovima posli ista ta spiza jist sa istim guštima.
Niki ćedu reć da je buzara autohtona hrvatska spiza, ma je i bez šahovnice dobra.

Dunkve, parićavali smo pedoče na buzaru i činili smo makakadu s vinima pa smo sjubili moslovačko vino s divičanskim ćutom Mediterana. Ja i plavac gremo svudi skupa, ako triba i u raj i u pakal, ma vega puta sam pusti na mediteranski zog i par baloti iz Moslavine. Homoća redom, od buzare do lungo mare.

Ja nisam veli đogadur od kužine, ma morem izist i popit ka autohtoni hrvatski bahić i karatil.
Špjegaje svit da je 200 gram pedoči po glavi jušto, ma nećete falit ni sa pol kila i veće, sve ovisi kakva je kome ćiverica. Meni po glavi moreš tumbat i po par kili spize, a bez da mi izajde njok.

Pedoče ne vaja puno mučit jerbo nismo na Blajburgu i vaja ih samo lipo isfregat, bokun izgratat i potoćat u šug od uja, luka, petrisumula, prezle i bilega vina. Naturamente, češnjak se šufigava s petrisumulom na maslinovom uju, a bilo vino se nadožuntaje kada pedoče počmedu skakat ka ždribice. Oti eliksir će štucigavat pedoče da laškaje onu najlipju likariju izase, po kojoj će vonjat ne samo cila kužina vengo i škale i dvor i svit ča pasaje kaletom. Meni propja dojde jubav na justa kad se pedoče razbalaju po bronzinu ka da su na humčanske bale.
Kogod miša kutlom oliti kacijolon, a kogod trese teću ka bračnu kočetu – dojde ti na isto.

U petnajst minuti će se blaga ukazat iz tih zvonkih škašeli, a ako ostadu zaklopjene svit špjegaje da hi vaja deštrigat. Kako sam ja redikul i sirovina ča mora svudi prodrit i sve razdrit, ja mora uć u svaku. Pedoču, da se razumimo.

Sve vo more se činit i na crveno uz konšervu, ča se svituje onima ča ćedu jist ovu božansku spizu uz manistru. More se jist sve vo i uz pulentu, a ako mene pitate nema boje nego cilu pekariju od Šiptara potočat u šug od buzare.

nfd

A koje vino lokat uz buzaru? Ma more se lokat ča hoćete. Ja sam za vu priliku se maši za Pinot Bijeli od Vina Košutić i guštali smo do samega dna. Va spiza se jubi dobro i sa Malvazijom, Pošipom, a mi Dalmatinci ločemo plavce uza sve i svašta, pa i ovu buzaru se more polivat Dingačem dok plovi na put u plemeniti drob. Ako niste znali, more se uz ovo lokat i tamno pivo kako to činidu Belgijanci, koji uz pedoče jidu i kumpire.

Za kraj vaja reć fala prijateju Mirku ča se opošteni sa pedočama.

Evo, dokli pišem ovu štoriju, ogladni sam bidan i gren vidit je ča pedoči ostalo za bale sutra.

U slast svima ča ćedu guštat u buzari, a ako jema koja šesna šinjorina ča bi guštala neka mi se javi i neću joj puno naplatit. Zdravi i veseli bili uz dobar stol ili ispo njega!

Odgovori

Please enter your comment!
Please enter your name here