ŽEREN I LOČEN Litnji bokuni starih bonkulovića

Je, bome je lipo vidit čagod šesnega u pjatu. Bome je lipo vidit i sve no okolo pjata, sve no ča se ji sa bande i ono ča se toči u žmule. A bome najlipje je vidit okolo stola stare drugove.

Moj vični prijatej Ivo svakega godišća na svoju teracu puni justa i srce deboto svim svojim prijatejima. Svakega lita u njega dojdemo žerat i lokat, pizdit obo svemu. pjucat čagod, volit sve i svakoga. I tako je bilo i vega lita kad smo mu u goste došli Lovre, Pipa Kanjota i vaš ponizni redikul.

A naš domaćin je veli đogadur od kužine, ma se on ne voli busat u prsa. Digod nam se pridruži i njegova šesna ženica Gušterica ča je bila moja jubav tamo nikuda u peti osnovne, ma je ve u junosti ukaživala vele mote inteligencije jerbo me se ofrankala po kratkom postupku. I tako se udala za jednega velega čovika za kojega bi i ja najradije da me posvoji ili čagod takvega.

U Guine, kako mu je ime po fameji, se uvik dobro ji, a još boje loče. Tako je bilo i ovom (ne)prilikom kad smo kusali lipe bokune, a šporki jezik obilato zalivali bilim, rose i crnim vinima. Na prvu mi se činilo da ćemo sjubit no ča se ne bi tribalo jubit, ma je Ivek jema voju činit makakade s vinima i bome je proročki izve ovi bidan narod sa svoje terace ne u zemju meda i mlika, vengo u zemju pašte u woku, pečene orade i gušti kakovih se ne bi posramile ni najboje konobe Mediterana.

Aperitiv je bila bira i to lešana i šufigana doma. Zatvorte Karlovačko i vazmite Guinu da vas pouči ča je piva. Eto. Bila je to ješka za jednu baš lipu i mokru večer, a ni dažjilo vanka, samo unutra.

Iz pjata je prvo zavonjala manistra u woku, Bokun kapule, paprike, pomi, gljvi i repi od škampi se šufigalo, a to sve se poškropilo sa malo metrosekusalnijih ćuti worchestera, soya toća, tabasca, meda i vina. I pri nego ča sam tumba sve u jamu bez dna, ve sam gušta u toj spizi.
Pensam da je to vonjalo sve od Vrdolca do rive. A u pjatu se sve to kočoperilo vako kako špjegaje letrat.

Razbalani wok

Moremo reć da smo guštali u Primitivu, ma i u drugim vinima južne Italije, Baranje i Moslavine. Svako vino jema svoju štoriju. A mi smo uz veleti štoriji obo starim štajunima arivali i do vrhunski pečene orade s depjom soli.

Pečena orada ala Guina

Ča da vam rečem, di Lovre i ja sednemo domaćin će sutra morat u butigu. A bome i naš četvrti drugi Pipa Kanjota je obilato zaliva vu oradu da ne plovi ususret kiselinama droba bez vali od dobrega vina. Uz vo pečenje loka se punih just Eremo San Quirico ča se našpuga vulkanske stinje dične vinarske regije Taurasi. Pravi mirakul od vina. I ne samo to, veli mirakul za učinit redikula i šempju od sebe.

Ali ni to bila samo večer dobrih bokuni. Našemu domaćinu svaka fala, ma je i on sam reka ča je na toj njegovoj, ćutima bogatoj, teraci najboje. To su prijateji. To su stari štajuni koji nas fudraju puno veće vengo vrhunska vina. Judi su ono ča ostaje. Orade, vino i cila gozba, jemaju svetu misiju da inkolaju stare prijateje još jedan put. Ča ti je uzvišenost spize kad spaja jude ka Bog.

stariji drugovi

Ivo, Pipa, Lovre i conkulasti čuvar žmula. Jebenti namisti sam se ka da će mi letrat progucat žmul. Dunkve, vo je no ča je velo blago vakih večeri. Ništa ni vridnije od čovika. A ja sam eto obasjan tom srićom da poznajem vake dične jude ča jemadu šesne fameje (a napose jedan među njima ča jema ždribicu doma, obo čemu ću jopet čut pištulu kad me intra).

Reklo se puno lipih riči, izilo se šesnih bokuni, polokalo se svega i svačega, ma oni mali mot na kraj just, ono šesnega smiha u brk, to je zbog cerekavih duši ča su se inkolale okolo stola u nike nove uspomene.

Odgovori

Please enter your comment!
Please enter your name here