Užežin svetosti se ispitijem

A ča da ti rečem Bože. Sve ča si reka, dobro si reka, ma mi se pari da sam ti ja čini kontru. Ča da se ispovidim po libru, boje bi bilo da ti špjegam sve no ča sam učini dobro po Tvojim uzancima. E tote bi kartulina spala na dvi-tri beside.

A jopet te molim da mi podariš čagod dobrega. Svi govoridu neka je zdravlja i jubavi, a ja bi još pokojega janjčića ako more, a da se ne jidiš. Ža mi je beštiji pa hi zbrinjavam. U oni tvoj lipi libar najdraže mi je kad Gospod reče nalož’te oganj. Odma mi sveti leptirići balaju po drobu. Ča ti je pravi libar.

Vengo, Bože, kad nako mislim, brž mi grisi i nisu toliko veli. Je da sam hodi kontra svetega libra i pištuli, ma često nisam bi tega svjesan. Znaš kad si pijan da ne ćutiš baš sve dobro? E, ne bi se ja toliko ogriši, ma su krivi oni zlodusi iz konobe ča me tantaju da glumim karatil. A ja kako jubim braću svoju, grubo mi je bilo reć da neću. Pa sam se u svemu temu pogubi, je bi tribalo jemat mire u iću i piću, ili bi tribalo jemat mire u jubavi prima braći? Ja sam pensa da je boje jubit braću pa sam se obleja veće puti kako je jubav i tila. Reklo bi se nako po notarski da sam bi neubrojiv kad sam počini grihe, pa nu gledaj da me sudiš ka Juru Fekalona ča se oblejava i kad ni bilo zbog jubavi. Njemu bokun udri dreturu prima Duhu svetemu, a skužaj ča ja bacijem na njega prvu stinu. Evo gledam da je bokun manja, nako ka za činit žabice na more.

Je, ispovidit ću se danas, kako i toka. Ma ovo sad ja bokun ušporko s tebom ćakulam. Reka je kurat da triba učinit ispit savjesti, pa se evo ispitijem. Vako ča gren daje, pari mi se da ću si dat vele punte. Ni do mene, nego je do just. Justa su sama izila veće nego ča je mene tokalo, ma hi nisam moga fermat. Jušto tako je bilo i bevandima, ja govorim u sebi “ala mola, po voji Gospodina!”, ma justa vražja omlohavila i ne badaju me. Da sam si par žlepi, ma mi ni to ni bilo na pomoć. Je ti vidiš Gospode moj koju sam ja kalvariju pasa? I sad rec, nakon ka pošten sudac, je bi svira ti koji faul na meni? Jerbo me je bidnoga iscipalo, ižgincalo, dešvalo, dežgracjalo, bumbižalo i svalega drugega vraga. Veleti sam ti ćuti patnje.

Ča volim vo ispitivanje savjesti. I haaški sud bi pensa da sam ovod žrtva bisnih podrugljivci i šempji. A tek ženskih! Oboj ča su mi činile, propja me stegne u bedrima za špijat. Ja sam se tuka da se držim čistoće, ma su one na mene bacivali riđipete, mudante, seksi bičve. Jadan ti sam bi, ja bi se škapula ma one su se hizale i nisu me molale da ih nase obučem. Đavli, ča drugo reć, moj Gospode! Palo mi je napamet da hi udunem baturicom, ali jopet sam se siti nega s jedne pištule da vaja jubit braću i sestre. Odma mi se ta ženska učinila veće ka svojta, a ne ka napast, ča da ti rečem. Ma se te vražje sestre nisu držale sestrinski nimalo, ča da ti rečem! A ja sam se tote ve izgubi, ča bi se reklo po notarski, jopet sam bi smanjeno ubrojiv. I one su ti tako meni veće puti slučajno smanjivale ubrojivost.

Eto, Gospode, nevojan sam doša ispri tebe, ne dopusti da me vako šporkaje ta banda. Udri mačem po zlodusima! Isto nemoj okrpit dvi-tri šinjorine ča su nako bokun šesnije. Ma ne bi te ve zamara, to ću reć popu. Zna i on ča vridi.

Gren sad skrušeno obidvat nemrsno, ćapala me debuleca od ve muke.

Odgovori

Please enter your comment!
Please enter your name here