Ugotom sam je škapulava

A pari mi se da mene uvik toka vela lavura, ma koliko da force u dangubljenje. Hodi sam se potočat u more sad kad ni već velega šušura. Pensam se tumbat na kraj mista u more i bokun špjegat sa crcajcima. Daje od judi, da mi padne koja pametna na pamet. I tako dok sam hladija pamet, gledam jednu šinjoretinu kako se hoće pribacit priko zidića. Bit će bidna gledala se digod utirat među škrape, da je niko ne uslka ka veliku bilu psinu ili kitovo mladunče. I eto ti đavla, zadila je kopitom za zidić i oblufnula u draču. A zid ka da ga je potegla topovska bala, Bahuja200. Ko za dišpet nigdi nikoga, računam uteć ali beštija viče. Ništa, baci sam drob u prsi i iša spasit zidić jerbo znam čija je ograda. U ti momenat dotrče i šesna šinjorina Talijanka, cila u afanu da ča je. Ča ča je, evo bovane dižem. Ćapa sam par vekih kusi ča je bala obalila i lipo hi složi na kup. Govorim ekola ka novi. Talijanka viče ajuto da joj je vo prijateljica u bušku, a ona ka gundej na škini ne može ni vamo ni tamo. Hiza rukami i bogami, motaje mi da je dignem. Gledam ovu šesnu šinjorinu i pensam toka mi bit junak pa capam balu za ruku, ali ko će potegnit oti piz. Dobi sam momentalno kilu, giht i anginu. Vidim ja neće to lako, a ova šesnica skače ka kozlić okolo mene. Ja joj migam, a ona ajuto ajuto. Ča se jidiš odma, pa potegnut ćemo otu maonu borati. I jema sam prav, Miko je veza ugotu ogradu dalje. Eto mene s ugotom za par minuti. Vežijem ovu šempjanu balu i nastojim joj ne gledat mudante jerbo toliki lancun ispod nisam vidi nikad. Obedvi me gledaju ka puhi u lampadinu jerbo su pensale da ću zvat vatrogasce ili komunalno. Ma ča ćemo činit lavuru poštenemu svitu, ala šo po ugoti, udrem je po guzici. Ugota potegne maonu i svu draču s njom jerbo nisam računa da kad gudić gre iz buška da i bušak gre sa njim. Počmedu obedvi vikat na mene, ali jedan glas guta već daljina. Zaboravi sam ćapat ugotu i bidna beštija je potezala nesritnu balu svugdi. Trčem za njima i ćapajem beštiju, a onda odvežem i šinjoretinu. Ja pun sebe nako stojim kako smo sve rišili, a ove dvi na mene da ča se bahujstvo ografalo. Da je svit normalan bi bi junak dana, a vako sam ih posla u niko misto.

A sad gren iškat ugotu.

Odgovori

Please enter your comment!
Please enter your name here