Sveti Mikula, nek bude frnjokula

Danas se spominjemo svetega Mikule ča je tamo pri 1700 godin bi čudotvorac, humanitarac i vela persona, a danas je svetac ča puni bičve. Tega velega čovika malo tko spominje zbog čudes ča je čini, a spomendan na njega slavi se šuškanjem špacetanih pizdariji po bičvama i kalcetama, ča će već za koji dan finit u zahod ili digod u škafetin. Ča je manje duha u narodu, to su veće gomile škovac po kućama.

Sveti Mikula molaj bičve i svakoj ćiverici timbraj po jednu svetu frnjokulu. Nama odraslim mazgunima ošini i po par komadi, da se spomenemo bit bolji jedni prima drugima na obične dane malega čovika. Bumbižaj nam još jednu frnjokulu da nam zvoni par šetemani bar, da nas zove na pamet.

Judima ča slave danas svetega Mikulu čistih bičvi, neka je veselo i razigrano. Ovima ča su ukreli bičve, dabogda ih sveti Mikula obuka u njih pa da gredu portom ka šempjana kalceta. A bidnemu svitu ča nema dobre bičve, neka mu ih sveti Mikula donese kad već nismo mi. Ča će darovi u bičve ako su probužane?

Nakon tega, pri nego ča greš ća lipi naš Mikula, udri po par frnjokuli svakoj ćiverici da joj ne fali. Možda nakon tega darujemo našoj dici ono najvažnije – nadu u lipi život u našoj lipoj Dalmaciji.