ŠJOR FARABUT U gaće mi stres, nima ženske za ples

btf

izvor: Šjor Farabut

Ne morem ve vako. Jušto se paričan bacit na ženske i onda stožer izdaje nove befele.
Par šetemani se paričajen za stiskavac i onda kjuzo, ča ste balali, balali. Stožer mi čini stres.

Jušto vazmen novi veštit, ka za pegulu broj infetanih odma timbar na 200. A meni tlak 220 ča san da puste šolde za se obuć u monu. Kad sedin doma, broj infetanih je manji od broja postoli.
Kad ležin doma danima ka kampjun, deboto da nema infetanih. Eto se spustin na rivu, ka da korona odma spaja obrve. Žuta uzbuna. Kalan se na rivu tri dana zaredon, crvena uzbuna, protuzračna obrana. Da ću u disko, vaja balat po smriču, a ne na podij. Stiskavac niente.

I navik ta besida da će u deveti misec doć vela nevoja. I kako da ja onda jeman potenciju? Grintaju svi da neće bit pinez, da ćemo stavit zube na škanciju. Pa ti, Farabute, pensaj jubavno.
Ma dobro je ti stožer zna da će me mater ubit ako ne najden žensku? Ma koja korona, mater će mi lazanjuron nanit boli. Ko će cilu zimu slušat brontulavanje obo temu da jopet nisan naša žensku. Baci bi se na kraj lita na bilo koju, samo da se škapulan te muke. Ali ne, stožer mi deštrigaje voju, dešvaje mi afrodizijak.

Pojte kvragu..Meteori, potresi, kuge, povodnji – pa ti najdi žensku. Gore nego gvera, lakje bi je naša da bumbižaju kaluni. Kojugod meštrovicu bi stiska da je škapulan i od šoka bi joj došla brž i jubav. Ali ne, mora se kalat cili Božji švog na nas kad ja bidan išken žensku. I onda mi stožer čini befele ka da sam u Aušvic.

Jušto pasan kroz tu muku, a onda će mi svu zimu Mater pištulavat obo ženskima i ča bi tokalo.
Čekan još da dojdu miljarde gundeji i da kogod prne sa satelita nuklerani otpad. Još to i moremo poć na Urlaub u greb da se laškamo truda.

Izvor: www.sjorfarabut.com

Prethodna objavaPjesma SUDBINA
Sljedeća objavaDNEVNIK Saaavršene ljubavi: Nanovo rođen
Slaven Vujic
Pišem svašta, većinu toga ne osobito dobro. Čakavska satira, ljubavna poezija i satira, duhovne knjige, slikovnice, priručnici, romani u nastajanju. Ne zbog raskošnog talenta, već nepoznavanja samog sebe kojeg otkrivam kroz brojne žanrove. Pisanje je uznapredovalo od hobija do profesionalne karijere samo zbog dvije stvari: nitko mi nije htio dati posao, a moj sin je trebao priliku za bolje zdravlje. Pišem i stvaram samo radi tebe, Vito, zlato tatino.

Odgovori

Please enter your comment!
Please enter your name here