Nek krepaju koeficijenti

Hrvatska je apena dobila spomenicu za najizlitaniju državu u Evropi. Govoridu da smo najveći lupeži i da se u nas okotila korupcija. Onda govoridu da smo najveća siromaška u uniji. Europske debele guzice znaju sve da u nas ne va ni bit bolestan, ni hodit po sudu. Cila država nam je izburdižana a fortunal nikako da kalma. I baš nami gre timun od Evropske Unije, a ne znamo ni svoj kaić po bonaci šijat?

Štajun je od demonštracjuna. Narod pizdi digod dojdeš. Žalidu se u bolnici, u pošti, u socijalnom. A evo, meštri i profešuri su išli u demonštracjun. Premijer je izaša ispred njih, ma su mi oni digli koltrinu ispri just. Puha je u nju ka kučin u guzicu od maške. To ča je on reka ne bi razumi ni Ajnštajn jerbo je vo od Prvega čovika veća teorija relativnosti. Ižginca bi mozak da gren sad računat koliko punti veće će dobit profešuri pa sam ono ča je reka pomnoži sa 100% pizdariji i nekako mi je ispalo da je sve jedna vela laž i da će Vlada na lažini suhoj ležat dok će profešuri tulit ka galebi.

Dok traje vi demonštracjun od nevoje, svit se grinta jerbo dica ne gredu u škulu. Dica su đogaduri na Plejstejšn, a profešuri bacijedu balote na Plenkistešjn. Za to vrime roditeljima restu karote na glavu i babure u uši. Gratadu se po ćiverici ka’ da jemadu ušenke.

Najboje zakrakunat škule i svi u Švabenzi. I dica i profešuri i roditelji. Ostat će lipa zemja Hrvatska, država di su krepali svi koeficijenti.

Prethodna objavaBarufa za marendu
Sljedeća objavaCrni petak – ko je uduni sviću?
Slaven Vujić
Stvaranje je uvijek bila moja strast. Stvarati poslove, projekte, knjige. Danas pišem priručnike za samoizdavače na engleskom jeziku, a na svom jeziku razne priče, slikovnice i poeziju. Pišem i izvodim Šjor Farabuta na čakavici. Gutam sva štiva vezana uz Tolkiena i vodim Tolkienology, humorističnu stranicu baziranu na njegovim djelima. Literarna sam lutalica, što sasvim dobro paše uz moja razmišljanja o životu. Tolkien me najbolje poznaje kad kaže "nisu izgubljeni svi koji lutaju".

Odgovori

Please enter your comment!
Please enter your name here