Nauka o nadimcima

U malim mistima nema puno pardona za fizičke ili moralne falinge. Ono ča si će te i uresit, dobit ćeš nadimak po miri. Tako će čovik s velim ušima bit Dugouško, a onaj se velim nosom – Nosonja. Ko slabo vidi će bit Očalinko, ko cota će bit Coto, ko je pogrbljen će bit Gobo, a ko ćepeka – Ćepekalo. Ko prazni jame će bit Govnar ili Fekalon, a ako ćemo veće po gospodski, bit će profešur od govan, ili inženjer od litavice. Puno debeli čovik će bit Bahić, Karatil, Maona, Mih, Debeloguzac. Gay čovik će bit jednostavno Peder. Ako si Bosanac, dobit ćeš nadimak po onemu ča činiš – Pero Zidar, Rudi Keramičar, Meho Pitur. Ako si doša u malo misto nakon puno godišć vanka, onda se zoveš po bandiri – Jere Švicarac, Nikša Holandez. Ako si puno godišć študira, zauvik si Študent. Ako si pošćer, možeš biti samo i jedino Pošćer i to poništaje sve druge nadimke. Isto je sa pandurom, mesarom, grobarom ili zvonarom.

U malom mistu sve je naopako pa je tako najobičniji posal za doture, meštre i profešure. Oni koji radi u zelene i zalije palme je inženjer. Ko kupi smeće je meštar od škovac, a ko vežije trajekte je inženjer od cime. Oni ča prodaje vrduru na pijacu je dotur od vrzota, kapo od fažoleti. Ako kojim slučajem ni dobi tako akademsku titulu, onda ga se zove po vrduri – Pomidor, Petrusimul, Kumpir, Kapula, Kupusar. U nas ča je dičnije zanimanje to si veći lupež i danguba, a ča je prostiji posal to si veći dotur i inženjer. E.

Ako ti se dogodila nika dežgracja pa se ukazalo da te čagod slabo gre, to te prati cili život. Ako te šinjorine nećedu, onda si DonJuan ili Casanova. Ako plivaš ka sikira onda si Dupin. Ako nimaš sluha jer ti je tovar prni u uho, onda si Pavarotti. Ako si lud u glavu i pišeš pisme i štorije, onda si Cesarić ili Cervantes. Za slučaj da si najgori na balun, svi će te zvat Maradona. Ako si se stuka sa kultivatorom, ne možeš uteć da te ne zovedu Lauda.

Ako butaš rič sa sela (ili iz drugog mista) u malom mistu kad si u viziti, postaješ ta rič. Tako si Tonka Gvanćera, Fabe Patakenjac. Ako te snimala televizija, a fali si rič, postaješ ta rič. Ako je bi gust promet i reka si da se učini grop, onda si Jozo Grop.

Nevoja te snašla ako ste blizanci, avancat ćete skupnu nadimak Dva Jaja ili ništor slično obo jajima. Isto tako ako ti je stariji brat Praskva, ti bi moga bit Nešpula. Ili ako je on Dinja, tebe toka Cata. Na nesriću, ako ti je otac Telac, ti si Telić. Može ti se dogodit i da ti se nadimak nadogradi. Recimo zovu te Karota, a ako oženiš ždribicu ča govori ekavicu onda te prekrste u Šargarepa.

Eto tako vam to gre u malo misto. Sve činimo naopako, a kako cila država gre ukrivo, možda je vo naše dobro nasađeno. U nas se čovik ne ulipšaje besidom već baš kontra ga se maškaraje i čini još betežnijim nego ča je.

Odgovori

Please enter your comment!
Please enter your name here