Ko me zove, ko me zove, ko me zove za duge moje

Zvali su me iz onog Eos Matriksa ili kako se zove đava od firme za naplatu duga. Da ima neki dug po mobitelu star dva miseca. Oti mobitel sam vaze za Juru jerbo je Jure ne na stupu srama nego na vidikovcu od jada. Da dobar mi dan, tote Željana iz Matriksa, je li može se spominjat s menom. Di si Željo, a si i ti pala na moj šarm. Da zove radi duga. Ne bi me posli tega vratila ni afrička šljiva. Dugujem po Juri 297 kun. Ma ni problem, platit ćemo, ma ča ti mene zoveš u 7 uri navečer, da me taman pri Dnevnika ispizdiš ćerce. Da oni imaju prav zvat za ugovornog partnera. Slušaj ti mene Željo, nazov Bandića jerbo mi se baš on čini ka da je ćapa ugovorne partnere za jajca. Zov Njonju da su mu istekli impulsi za srat po Saboru. Zov sve te pizdune ča ćućaju narod ka ugovorni partneri, neka vraćijedu ča smo mi ugovorili za njih gospodu da jim se najde kad su na vlasti. Evo, ja ću ti bit Željo ugovorni partner i izbatinaj takujine gubi ča im se pinezi kote u žep brže nego gvaca ispod just. Nu dojdi mi da se ugovorno partneriziramo pa da možeš zvat svakega patataža ča mi je dužan par patakuni.

Tu-tu-tu-tu

A ne, neš majci. Zovem ja njih. Alo, da je to ugovorni partner ča meni triba za izmust pinez od svita. Da dobili ste tvrtku Eos Matriks, zovete li radi duga. Zovem radi ušenki, napale mi glavu pri Dnevnika, ražešćilo me a nisam vidi nijednu conkulastu glavu od vlade. Pitam di je Željana. Da ča će mi. Govorim da je jušto utekla iz seksi razgovora di sam kreni bumbižavat sve po spisku. Da je nakon predigre me ćapala trenta uno, a ona utekla kad se trebamo partnerizirat.

Tu-tu-tu-tu.

Odgovori

Please enter your comment!
Please enter your name here