Crni petak – ko je uduni sviću?

Crni petak je. Pizdarije ča su poskupile 1600 posto će se danas cerekat uz popuste od 50, 60 posto. Homoća mone i cukuni u butigu, evo gre Sudnji dan! Ča sve neće Đava smislit za išćućat patakune iz nevojnog takujina.

Nu nu, kup si mudante za 29 kun, ušted’ još toliko, a ve sutra ih obisi na šćap. Kupiš plavi lancun u Kineza za 49 kun, a ujutro pariš ka da te udri kulap po noći. Ili vazmi automatsku kosiraču za čistit masline, a kad bekne drugi dan ćeš je koristiti za gratat guzicu. A kad smo kod tega, rekli su mi da puno spominjem guzicu. Je, u nas puno tega počinje na guzicu, a bome i fini na njoj. Ne znam je koja rič može boje opisat Sabor.

Dok ovo pišem ubra sam boršinić na buganvilu, ča me sitilo na kauč tete Petronile iz Austro-ugarske. Digle su mi emocije ka paradižet. Taman bi triba nu pedersku boršicu jerbo su mi probužani žepi. Ča jema veze ča je na cvitiće, važno da je crni petak i da je na popust. Bokun pariške mode po portu neće škodit.

Ni u nas crni petak jer su se izvrnule cine vengo  zato ča je niko uduni sviću ve odavno.

Prethodna objavaNek krepaju koeficijenti
Sljedeća objavaPisma DALMACIJO NONE I NONOTA
Slaven Vujić
Stvaranje je uvijek bila moja strast. Stvarati poslove, projekte, knjige. Danas pišem priručnike za samoizdavače na engleskom jeziku, a na svom jeziku razne priče, slikovnice i poeziju. Pišem i izvodim Šjor Farabuta na čakavici. Gutam sva štiva vezana uz Tolkiena i vodim Tolkienology, humorističnu stranicu baziranu na njegovim djelima. Literarna sam lutalica, što sasvim dobro paše uz moja razmišljanja o životu. Tolkien me najbolje poznaje kad kaže "nisu izgubljeni svi koji lutaju".

Odgovori

Please enter your comment!
Please enter your name here